Return to site

إزاي تعرف إنك ماشي في الطريق الصح؟

طبعا إنت عارف أهمية الإصرار والعزيمة والصمود أمام التحديات والصبر حتى الوصول للهدف

 

ده كلام جميل ومحفز جدا

 

بس لو إنت ماشي في طريق غلط يبقى إيه فايدة الكلام ده كله … لإن ساعتها الإصرار هيبقى إسمه عند أو تهور

 

طيب إزاي تعرف إنك ماشي في الطريق الصح؟ ... علشان ساعتها تقدر بكل قوة تقاوم أي تحدي أو تحاول مرة تانية بعد أي فشل وتتمسك باصرارك وعزيمتك لغاية ما تحقق هدفك

 

...ببساطة شديدة إسأل نفسك سؤال واحد بس

 

"هل أقدر أعيش مبسوط من غير تحقيق الهدف ده؟"

 

لو الإجابة أيوة يبقى تخلى عن إصرارك فورا … لإن الهدف ده مالوش أي قيمة بالنسبالك

 

لكن لو الإجابة لأ يبقى اعمل المستحيل علشان تحقق هدفك

 

...مثال

 

عاوز تبدأ مشروع خاص … حاولت كتير قبل كدة وفشلت … خايف تجرب تاني … خايف إنك ممكن تكون اخترت هدف مش مناسب ليك وإن الوظيفة ممكن تكون هي مكانك المثالي

 

اسأل نفسك السؤال

 

"هل أقدر أعيش مبسوط من غير ما يكون عندي مشروع خاص؟"

 

...أو من زاوية أخرى

 

"هل أقدر أتحمل إني أكمل طول عمري في وظيفة مابحبهاش؟"

 

لو الإجابة أيوة يبقى إوعى تسعى أو تتعب نفسك ورا الهدف ده … لإن مع أول تحدي مش هتقدر تصمد … والإصرار على تحقيق هدف مالوش قيمة مش ذكاء

 

بالنسبالي لما كنت بفكر في السؤال ده كنت بحس إن روحي بتتسحب مني … لمجرد إني أتخيل إني هكمل طول عمري كدة عايش أقل بكتير من إمكانياتي وطموحاتي

 

هدف إني أبدأ مشروع خاص في مجال أنا بحبه وإني أعيش حياتي باسلوبي مش باسلوب مفروض عليا كان بالنسبالي حياة أو موت … علشان كدة فضلت صامد وصابر ومُصر على تحقيقه لمدة ١٠ سنين كاملة

 

إنت كمان إوزن الأمر بعقلك وقلبك … ولو لاقيت إن الموضوع بالنسبالك لا غنى عنه بأي حال من الأحوال، يبقى إنطلق وماتبصش وراك تاني مهما واجهت من تحديات

 

خلي_شغفك_شغلك#
محمد تهامي
 

All Posts
×

Almost done…

We just sent you an email. Please click the link in the email to confirm your subscription!

OK