يا أهلاً وسهلاً
في المقالة دي هنجاوب على أول سؤال بييجي في بال أي حد عاوز يبدأ مشروع جديد
خصوصًا لو بقالك سنين بتشتغل موظف في شركات كبيرة، وبعدين خلاص زهقت من الشغل أو تعبت من الشغل، وعاوز تبدأ مشروع خاص ... علشان تكمل بقية حياتك حر نفسك، بتعمل حاجة بتحبها
علشان كدة عاوز أقولك إزاي تلاقي أو تحدد المجال اللي تقدر تبدأ فيه مشروع ناجح
وتبدأ زي ما احنا بنقول دايما في
passion to profit
جنب شغلك الحالي، لحد ما تتطمن إن خلاص المشروع حقق ثماره، ونجح، وبيكبر يوم عن يوم، فتقدر تطمن إنك تتفرغ ليه وتسيب الشغل اللي إنت فيه حاليًا
في 4 طرق ممكن تحدد من خلالهم مجال مشروعك
١.
Trends
يعني تشوف إيه اللي ماشي اليومين دول؟
جت فترة مثلاً الـ
bean bags
كانت موجة ماشية كل الناس بتعملها
...انهاردة مثلا عربيات الأكل
تابع الـمجالات اللي بتكبر وعليها إقبال كبير... وممكن تختار إن يكون الـبزنس بتاعك في مجال من دول
٢.
Needs
إزاي تقدر تسد نقص معين في السوق؟
لما سعر الدولار زاد، أصبح في حاجات كتير كان بيتم استيرادها من برة مبقتش موجودة، أو موجودة بس بسعر عالي جدا
فده خلق فراغ كبير جدًا في السوق، وممكن المصنعين المحليين يستغلوا الفرصة ويسدوا النقص ده بمنتجات جودتها عالية
فممكن تشوف الحاجة الناقصة في السوق أو حاجة تمنها غالي، وأنت تقدر توفرها بجودة وسعر أحسن بكتير
٣.
Franchise
لو أنت محوش مبلغ من شغلك حصيلة السنين اللي فاتت ومش عايز تعيد اختراع العجلة من جديد، يبقى ممكن تفكر تاخد فرانشايز لعلامة تجارية مشهورة
وياسلام لو يكون بيقدم فكرة جديدة للسوق
فبتشتري الفرانشايز و هو
business in a box
وبتطبق النظام اللي بيديهولك صاحب العلامة التجارية
في الحالة دي نسبة نجاحك بتكون كبيرة لإنك بتاخد اسم كبير وله سمعته
٤.
Passion
إنك تبدأ مشروع في مجال إنت بتحبه
ودي الحقيقة اللي احنا بنرشحها جدًا في
Passion To Profit
ليه إحنا بنفضل الطريقة الرابعة دي
خمس أسباب لاختيار
Passion-Based Business
١. الاستمتاع
وإنت بتأسس المشروع، أو وإنت جوه المشروع إنت بتعمل حاجة بتحبها في المجال اللي إنت بتحبه، بتحب تقرأ عنه، بتحب تفاصيله، بتحب تعرف كل حاجه عنه، فإنت مستمتع بكل تفصيلة
٢. الناس
وإنت بتعمل المشروع ده وأثناء إدارته هتتعامل مع ناس كتير
سواء موردين ... سواء ناس معلمين وموجهين، سواء زملاء بيشاركوك نفس الشغف، سواء فريق عمل هتبنيه حابب المجال ومتحمس لفكرتك
فالتعامل مع ناس بيشاركوك نفس الشغف بيبقى ممتع جدًا
بتبقى مبسوط لإن الناس دول بيقدّروا اللي إنت بتعمله وإنت هتقدّرهم؛ لأنهم بيقدّروا اللي إنت بتعمله، فبتبقى علاقاتك اللي بتبنيها معاهم علاقات قوية جدًا
كمان لما تيجى تتعامل مع حد ويشوف شغفك بيحس بيه جدًا، وده بيسهل، وبيفتح فرص كتيرة جدًا
خصوصًا لما تتعرف على ناس ناجحين في مجالك وتيجي تتكلم معاهم، شغفك بيبان و بتلاقي منهم دعم كبير جدًا
٣. الفلوس
لإنك بالتأكيد هتبدع ... لما تكون بتحب حاجة هتبدع فيها جامد جدًا ولما تبدع هتبقى متفوق وهتكسب فلوس كتيرة جدًا
الناس لما بتشترى من واحد عنده شغف بيحسوها وبيشوفوها
بيقولوا الراجل ده عنده شغف، الراجل ده مش بس عامل المشروع ده لهدف تجاري بس، لا، ده واضح شغله فيه إبداع ... شغله فيه إتقان ... شغله فيه شغف
فبتلاقي الـ
word of mouth
عليك بيبقى عالى جدًا
٤. التسويق
الشغف بيعزز فرصك، وبتقدر تبيع بسهولة ... لإن كل ما بتتكلم على اللي إنت بتعمله بحماس وإيمان بتكسب ثقة الناس وبتكون مقنع جدا وبالتالي بيكونوا مقبلين على إنت بتقدمه ويشتروا منك
إنت عارف زي ما بيقولوا الكلام اللي خارج من القلب بيخش القلب
الناس بتستشعر صدق اللي إنت بتقوله، بتستشعر شغفك للي إنت بتعمله، فبتفضّل إن هي تتعامل معاك عن أي حد تاني منافس ليك؛ منافس تجاري بحت يعني ... مشروعه للتجارة بس مش إن دي حاجة هو شغوف بيها من زمان وبيحبها ... بيبقى باين الفرق بينك وبينه وبالتالي بتوصل للناس بسرعة جدًا
٥. الرسالة
الحاجة الأخيرة بقى إن بعد شوية الشغف بيتحول لـ
purpose
بتدي لحياتك معنى
مشروعك بيبدأ الأول كحاجة بتحبها، وحاجة إنت بتبدع فيها، بس بعد شوية هتلاقي نفسك صاحب قضية ورسالة
أحد المباديء بتاعة
Passion To Profit
هي تبنى القضية
إنت بتوظف شغفك والمشروع بتاعك علشان تخدم قضية معينة
إحنا مثلاً في
passion to profit
بنخدم قضية
إحنا بنحلم نغير حال الموظفين في العالم كله، محدش تاني هيروح الشغل مكسورة عينه بس علشان لقمة العيش ... لا، احنا نفسنا الدنيا كلها، أي حد بيشتغل يكون بيشتغل الحاجة اللي هو بيحبها ويبدع فيها، مش بيشتغل مضطر، وغصب عنه وبيستحمل ظروف صعبة جدًا بس علشان الفلوس
فبعد شوية شغفك للمجال بيتحول إلى رسالة بتدي لحياتك معنى
مع خدمتك للناس والقيمة اللي إنتَ بتضيفها، هتلاقي الناس بتقوللك إنت غيرت في حياتي كذا، إنت فرقت معانا في كذا، شكرًا إن إنتَ ساعدتنا على كذا ... وشوية شوية هتلاقي الرسالة بتاعتك بدأت توضح
وده هيدّي لحياتك بُعد ثالث، بُعد أجمل بكتير، وبُعد أكبر بكتير من مجرد الفلوس والتجارة والبزنس
أكتشف شغفي إزاي؟
وده السؤال المحير للملايين، والحقيقة سبب الحيرة دي إن فيه طريقين لاكتشاف شغفك ... طريق صعب وده اللي بياخده معظم الناس وطريق سهل وده اللي بنساعدك فيه في
Passion To Profit
١. اكتشاف الذات
ده الطريق اللي الناس بتسلكه عشان تكتشف ذاتها؛ أنا عاوز اكتشف شغفي بهدف اكتشاف نفسي؛ يعني أنا مين؟ أنا ايه مواهبي؟ أنا ايه نقط قوتي؟ أنا ايه قيمي؟ أنا إيه؟ أنا مين؟
الطريق ده في منتهى الصعوبة؛ لأن الحقيقة رحلة اكتشاف الذات من وجهة نظري هي رحلة من المهد إلى اللحد زي ما بيقولوا
رحلة أبدية، طول حياتك هتقعد تكتشف في نفسك ... مفيش قعدة كده تقعدها وتقول أنا كده خلاص اكتشفت نفسي ابتدي اتحرك بقى
مفيش كده
لأن مثلاً إنت أكيد اتعرضت لموقف قبل كده اضطريت تعمل حاجة، وكنت متأكد أو حاسس إن إنتَ مش ممكن هتعرف تعملها
لكن لما جيت تجرب أو الموقف أجبرك إنك تجرب لقيت نفسك مش بس بتعملها، بتعملها كويس أوي كمان
واكتشفت ساعتها إن دي نقطة قوة عندك مكنتش واخد بالك منها خالص
فطول الوقت تجارب الحياة بتخلي الإنسان يكتشف ذاته، ويعرف أكثر عن نفسه، فلو أنت عاوز تاخد الطريق بتاع أنا عاوز اعرف شغفي من باب اكتشاف ذاتي هتلاقي الموضوع معقد جدًا
ممكن تلاقي عندك أكتر من حاجة بتحبها، فطبعًا هتسأل نفسك أنا مين في دول؟ وتفضل محتار ومتلخبط
٢. اكتشاف البزنس
فيه بقى الطريق التاني لاكتشاف شغفك وهو
business oriented
بحت
كل الحكاية إنت بتكتشف شغفك علشان تختار المجال اللي هتبدأ فيه مشروعك
فحتى لو إنت مثلا بتحب حاجات كتير، حلو جدًا، اختار واحدة منهم إبدأ فيها مشروعك ... لإن كتر الشغف ساعتها مش محير لإنه معناه إن إنت تقدر تبدأ مشاريع في مجالات مختلفة، عندك مرونة في الاختيار أو ممكن تدمج أكتر من شغف في مشروع واحد
فلو إنت بتفكر
business oriented
بعيدًا عن الجزء الشائك بتاع "أنا مين؟"، السؤال الفلسفي العظيم، فكل الحكاية إنت عاوز تختار المجال اللي إنت حابه وعاوز تبدأ فيه مشروعك
مجال بتحبه، وعلشان إنت بتحبه يبقى أحسن حاجة في الدنيا إنك تعمل مشروع، وتكسب فلوس من حاجة إنت بتحبها
٤ طرق لاكتشاف شغفك
فيه أربع طرق ممكن تعرف بيهم شغفك وبالتالي المجال اللي هتبدأ فيه مشروعك
١. الفضول
ودي حاجة أنا إتعلمتها من الدكتور إبراهيم أبو العيش؛ مؤسس إمبراطورية سيكم
من ٢٠٠٧ و أنا بعمل حوارات كتير مع ناس ناجحين في مختلف المجالات
وكان منهم الأستاذ إبراهيم أبو العيش، تشرفت بلقائه وسألته إنت اكتشفت شغفك للمجال ده إزاي
قال لي: "الفضول! ده المجال الوحيد اللي كان عندي فضول أعرف فيه كل كبيرة وصغيرة، وكل جديد، وبتابعه دايمًا، وبقرأ على طول مجلات، وعلى طول عايز أعرف عنه كل حاجة"
فأي مجال بيثير فضولك ده بالتأكيد أمارة إن إنت عندك شغف كبير في المجال ده، ولو بدأت فيه مشروع هتكون ناجح جدًا
٢. الجذور
الحاجة التانية إن يبقى المجال له جذور ... من زمان وإنت بتحبه، مش حاجة مستحدثة ... يمكن من وإنت صغير بتحب الحاجة دي
فأي حاجة كنت بتحبها من زمان ده مجال مهم جدًا تقدر تبدأ فيه مشروعك
٣. مثلك الأعلى
الحاجة التالتة هي الـ
role models
فيه ناس كده دايمًا بتبص ليهم ونفسك تبقى زيهم في يوم من الأيام
"نفسي أبقى زي الراجل ده، نفسي أعمل زي الست دي"
اللي خلاني اكتشف شغفي للـ
Motivational Speaking
هو إن كل الناس اللي كانوا مثل أعلى ليا كانوا الناس اللي بيقفوا قدام جمهور وبيقولوا رسالة ملهمة أو مؤثرة بتغير حياتهم للأفضل
السادات مثلاً، الشيخ الشعراوي في الدين، مش هنسى مثلاً الكلمة اللي قالها محمود الخطيب في اعتزاله ... أي حد في أي مجال كان بيقف ويلقي كلمة قدام جمهور كبير كانت الحالة دي بتخطفني
فإنت شوف مين الـ
role models
بالنسبالك
ممكن يكون الناس اللي بينسقوا ورد، الناس اللي بيعزفوا آلة معينة، الناس اللي بيلعبوا رياضة معينة، الناس المشهورة في مجال معين، أصحاب مشاريع معينة،
الـ
role models
بيدولك أمارة إن ده شغفك وإن إنت ممكن تخش المجال، وتبدأ فيه مشروعك
٤. الهوايات
أخر حاجة بقى هي الهوايات؛ ايه الهواية بتاعتك؟ ايه الحاجة اللي إنت بتمارسها في وقت فراغك؟ بتحبها و بتفصلك وتخرجك بره الموود، وبتجدد نشاطك
أنا مثلاً أحد الهوايات بتاعتي، وشغف كبير طبعًا جدًا هي الشطرنج
وعشان كده بدأت مشروعي التاني فيه
Chess Your Child
أكبر أكاديمية في مصر لتعليم الشطرنج للأطفال كوسيلة لتنمية وتطوير شخصيتهم
النهاردة موجودين في أكتر من 14 فرع، وأكتر من محافظة، وموجودين في مدارس إلخ
إنت ممكن هوايتك تستتفهها، وتقول ايه ده؟ دي هعمل بيها مشروع في ايه أو إزاي؟ ... لا، أيًا كان، طالما بتحب المجال تقدر تخشه، وتعمل فيه بزنس ناجح جدا ... وده اللي بنعلمهولك في
إنت في الأخر طول ما بتوظف شغفك في سد احتياج أو حل مشكلة عند الناس، يبقى ده هيكون مؤشر لبزنس ناجح جدا ... لأن الناس طول الوقت بتدفع فلوس؛ عشان تحسن حياتها، وتحل مشاكلها، أو تسد نقص عندها، إلخ
وده بياخدنا بقى للمفاجأة الكبيرة الخاصة باكتشاف شغفك
ناس كتير بتقول أنا معرفش شغفي ايه
...أنا بقالي ١٦ سنة خبرة في هذا المجال
محدش جالي وقالي أنا مش عارف إيه شغفي، وطلعت دي الحقيقة، كله بيبقى عارف، لكن هم مش بيكدبوا
هو بس القصة إن بيبقى فيه شوية ضباب كده في ذهنهم بيخليهم محتارين في شغفهم
وأكتر حاجة بتوقفهم هو سؤال ... أعمل بيها ايه؟
بيبقى حاسس إن شغفه ده ما يتعملش بيه حاجة، مش شايف ليه سكة
...الفكرة كلها إن أنا عايزك تفكر معايا بالمنطق شوية
هل المجال اللي إنت بتحبه ده ... إنت الوحيد اللي بتحبه ولا فيه غيرك بيحبه؟
المنطق بيقول إن أكيد فيه ناس بتحبه زيك، يعني إنت مش لوحدك بتحب الحاجة دي، وبالتالي أكيد حد عمل بيها حاجة!!
فلو إنت بحثت وشوفت معمول بيها إيه ... هيبقى عندك ثقة أكبر، وهيجيلك أفكار كتير ممكن تنفذها
ولذلك أنا عندي تمرين صغير بحب أطمن بيه الناس اللي بتبقى شاكة في شغفها وبتسأل يا ترى هو ده فعلاً ممكن يكون شغف؟ هو ده يتعمل بيه حاجة؟
The Google Test
ادخل على جوجل واسأله، إكتب كده في الـ
search bar
الـ
passion
بتاعتك وجمبها جملة
business ideas
وشوف النتايج
مثلا لو بتحب الحيوانات
أكتب
animals business ideas
هيطلعلك مثلاً على موقع
entrepreneur.com
nine low cost business ideas for animal lovers
وعلى موقع
SmallBizTrends.com
fifty unusual pet business ideas to consider starting
هتلاقي مواقع كتير بتديلك أفكار لمشاريع ممكن تعملها
في البداية إفصل دايمًا شغفك بالشيء، والمشهد الوظيفي بتاعه أو المشهد التجاري بتاعه؛ لإن ممكن دلوقتي متعرفش، لكن لما تنزل تسعى على الأرض، وتشوف غيرك عمل إيه هتكتشف حاجات كتيرة جدًا
هتشوف أفكار كتيرة جدًا، و هتيجيلك أفكار مختلفة وجديدة عن الأفكار الموجودة أو هتدمج أفكار مع بعض، وتطلع بفكرة مميزة
أتمنى المقالة دي تكون ساعدتك تعرف إجابة السؤال المشهور ... أعمل مشروع في إيه
حدد الأول مجال إنت شغوف بيه وبعدين شوف غيرك عمل بيه إيه ... علشان تقدر تعرف إنت ممكن تعمل إيه مميز عن غيرك وفكرة المشروع المميزة اللي تقدر تنفذها
...دي كانت مجرد نبذة صغيرة وعلشان مطولش عليك أكتر من كدة في المقالة دي
... لو عايز تتعلم النظام المتكامل علشان تكتشف شغفك وتحوله لمشروع ناجح
هتلاقي تفاصيل أكتر، وهتلاقي فيديوهات لقصص نجاح ملهمة خرجت من
Passion To Profit Community
انضم لينا علشان تكون قصة نجاح جديدة ... وافتكر
نجاحك أمل لغيرك، وهو ده اللي احنا بنؤمن بيه ... علشان كده حريصين جدًا على قصة نجاحك، وبنتابع معاك خطوة بخطوة، القصة مش مجرد كورس بتاخده
الكورس مجرد البداية علشان تتعلم الخطوات المطلوب تنفيذها ... إنما بعد كدة تقدر تشترك في أحد أنظمة الدعم المختلفة اللي بنقدمها علشان نساعدك تنفذ اللي اتعلمته وتعمل مشروعك الخاص بسهولة وأمان
للإشتراك ولمزيد من التفاصيل، زور الموقع