في البزنس هتلاقي شخصين مختلفين تماما في أهدافهم و طريقتهم في بناء و إدارة البزنس
شخص عنده عقلية الفرصة التجارية و التاني عنده عقلية العلامة التجارية
Commercial Opportunity vs Brand Building
اللي بيفكر بعقلية الفرصة التجارية أهم حاجة عنده المكسب المادي الكبير و السريع ... و ممكن عادي يبيع منتجات مش باسمه ... يستحوذ على شركة ناجحة و يكبرها ... أو يبقى هدفه من البداية خالص إنه يبني بزنس علشان يبيعه لشركة كبيرة بعد كام سنة ... وهكذا
هو مجرد تاجر أو مستثمر شاطر بيعرف يصطاد الفرصة المناسبة و يحقق منها أكبر مكسب
نموذج مثالي على كدة شخصية نجيب ساويرس
الشخص التاني اللي بيفكر بعقلية العلامة التجارية بيشتغل على المدى البعيد
بيكون تركيزه الأساسي إنه يبني اسم كبير ... يبتكر حاجة جديدة ... يضيف للمجال حاجة استثنائية تسيب أثر كبير ... حاجة الناس دايما تفتكرها و تنبهر بيها ... الربح المادي هيكون موجود من البداية أكيد ... ولكن الطفرات الكبير في الأرباح و النمو ممكن تاخد ١٠ سنين أو أكتر
هو شخص بيبني كيان يعيش من بعده و أثره يمتد لأجيال طويلة
نموذج مثالي على كدة شخصية سميح ساويرس (الجونة)
مهم جدا و إنت بتعمل بزنس إنك تعرف إنت أنهي شخصية من دول علشان بتفرق كتير في منهجية تأسيس و إدارة البزنس
أنا منهجي مناسب جدا للشخصية التانية (عقلية العلامة التجارية)
بزنس قائم على الشغف ... وراه حلم كبير ... و هدفه ترك أثر عظيم
مافيش هنا صح و غلط ... أهم حاجة تعمل الحاجة المناسبة ليك