زماااااان كان البزنس عبارة عن سوق بتفرش فيه أو بتاخد فيه محل ... والناس بتيجي السوق ده علشان تشتري احتياجاتها
بعد كدة تطور الموضوع شوية فأصبح فيه أسواق متخصصة ... سوق الخضار ... سوق السمك ... سوق القماش ... إلخ
و مر الزمن
و انهاردة فكرة السوق راحت من ذهن معظم أصحاب المشاريع ... فأصبحوا يتخبطوا و يعانوا في الوصول لعملاء جدد بشكل مستمر
السوق زمان بالنسبة لصاحب التجارة كان بيمثل فكرة إني أخد مكان في الحتة اللي الناس بتدور فيها على اللي أنا ببيعه
الفكرة دي ما زالت قائمة و هتفضل قانون حاكم لأي بزنس في أي زمان و مكان
"إزاي أكون موجود في المكان اللي العميل بتاعي بيدوّر فيه على اللي أنا ببيعه؟"
مع تطور الزمن و الإقتصاد و حركة التجارة ... الأمر ده أصبح فيه لبس و تعقيد عند ناس كتير
بس هو في أصله بسيط جدا
مثلا
النهاردة من الإستراتيجيات الأساسية لتطبيق "فكرة السوق" تكمن في قدرتك على بناء السوق الخاص بيك
بمعنى إنك بتتواجد في أماكن مختلفة بيكون موجود فيها العميل بتاعك ... بس مش بالضرورة يكون موجود علشان يشتري حاجة معينة ... زي مثلا إنه موجود يوميا ساعة أو أكتر على الإنستاجرام
فأنا بقدم محتوى أو أعمل إعلانات علشان أظهر قدام الناس اللي ممكن يكون عندها قدر ضئيل من الاهتمام باللي أنا ببيعه
المهم بقى إن لما يشوفوا المحتوى أو الإعلان، لازم أنقلهم لمنطقة خاصة تسمحلي أتواصل معاهم باستمرار
و مع الوقت المنطقة الخاصة دي بتتحول للسوق الخاص بتاعي اللي موجود فيه الناس المهتمة باللي أنا ببيعه
المنطقة الخاصة دي قد تكون: قائمة إيميلات ... جروب واتساب ... قائمة بأرقام تليفونات ... أو قائمة بعناوين المنزل أو الشغل ... إلخ
مع الوقت الجمهور اللي بيشوفك هيكبر ... وبالتالي ده معناه إن السوق بتاعك هيكبر ... و بالتبعية مبيعاتك و البزنس بتاعك هيكبر
فكرة بسيطة جدا ... لكن بيغفل عنها أصحاب مشاريع كتير جدا
إزاي أظهر في المكان اللي موجود فيه العميل بتاعي (سواء في وجود أو عدم وجود نية شراء) ... و بعدين إزاي أنقله للسوق الخاص بيا علشان يفتكرني في لحظة وجود نية شراء؟