من كام يوم كنت في مكان… وكان فيه 3 أشخاص بيتكلموا جنبي
واضح إنهم كانوا بيخططوا يبدأوا مشروع مع بعض
واحد فيهم كان ماسك ورقة وقلم… وبيحسب تكلفة المكان… والإيجار… والمصاريف… وبيقول إن المشروع محتاج يحقق إيراد معين كل شهر علشان يقدر يغطي تكلفته
وكان واضح إن الرقم كبير… والاتنين اللي معاه كانوا مترددين
وفجأة سمعت واحدة منهم بتقول بصوت عالي
"هو إنت فاكر إنك ممكن تبدأ مشروع بأقل من مليون جنيه… ده إنت تبقى بتهرج"
فسكت شوية… وبعدين قال
"آه طبعا معاكي حق… أنا بس بحسب علشان كل واحد يبقى عارف إنه مش هيرجع رأس المال اللي دفعه قبل سنة على الأقل."
الحقيقة… أنا كنت هتجنن
مش منهم… لكن من الفكرة نفسها
فكرة إن ريادة الأعمال لازم تبدأ بمليون جنيه… ولازم شركاء… ولازم تستنى سنة أو اتنين علشان تشوف نتيجة
مع إن فيه انهاردة نماذج مختلفة من البزنس ممكن تبدأها برأس مال بسيط جدا… جنب شغلك ... بأقل درجة من المخاطرة و أعلى درجة من الاستمتاع بشغلك ... و توصلك لشكل الحياة اللي بتحلم بيه
تقدر تختار منها اللي يناسب شخصيتك ... و حياتك ... و طموحك ... و قدراتك
أنا مثلا
مراتي مرة سألتني
"ليه كل شركة عملتها كان فريقك دايما صغير؟"
وإجابتي ببساطة ... لإن ده النموذج اللي يناسب شخصيتي
أنا مش بحب أدير فرق كبيرة
بحب أكثر أبني
Systems و Automation
... بحيث إنه يقدر يحقق إنتاجية عالية جدا بأقل عدد ممكن من الناس
بحب إن البزنس يشتغل بهدوء و روقان … و بأقل تعقيد ممكن
بحب نموذج الـ
Boutique Business
بزنس صغير… مركز… متخصص… بيقدم قيمة كبيرة… من غير ما يتحول لمؤسسة ضخمة
ده شكل من أشكال ريادة الأعمال
أهم حاجة عاوزك تفهمها و إنت بتحاول تبني أول بزنس في حياتك ... هي إنك مش مطلوب منك تبني المشروع اللي الناس شايفاه ناجح
المطلوب إنك تبني المشروع اللي يخدم الحياة اللي إنت نفسك تعيشها
ريادة الأعمال مش مسابقة ... و لا قالب واحد لازم كل الناس تدخل فيه
هي قماشة واسعة جدا ... كل واحد يقدر يصممها بالشكل اللي يناسبه
أنا طول الوقت بحاول أدافع عن سمعة ريادة الأعمال ... و أخلي الناس تشوف جمالها زي ما أنا شوفتها على مدار ٢٠ سنة ... لأنها في نظري عمرها ما كانت مجرد نشاط تجاري
أنا بشوفها المسار اللي بيسمح للإنسان يعيش بحرية أكبر ... ويشتغل الحاجة اللي بيحبها ... ويقدم أفضل ما عنده للدنيا
فبدل ما تسأل نفسك
"هحتاج كام مليون علشان أبدأ؟"
اسأل نفسك
"إيه نموذج البزنس اللي يناسب شخصيتي… والحياة اللي نفسي أعيشها؟"