بعد أكتر من ٢٣ سنة في دراسة النجاح و الناجحين اكتشفت إن أحد أهم قوانين النجاح هو إن يكون عندك "شخصية كبيرة"
The Law of BIG CHARACTER
النجاح محتاج شخصية قوية جدا ... و من أكتر الصفات اللي بتميز الشخصية دي هو القدرة على اتخاذ القرار
مثلا...
بشوف نوعين من اللي عاوزين يبدأوا بزنس:
١. نوع بيخاف ياخد الخطوة لإنه مش متأكد هي صح ولا لأ
٢. و نوع تاني بيدرس كويس و بياخد الخطوة بثقة ... لإن عنده حلم كبير و قرر بشكل حاسم إنه مايأجلوش أكتر من كدة
الإتنين عندهم نفس الموارد .. سواء علم أو فلوس أو علاقات ... لكن اللي فرق بينهم هو الشخصية ... و الحسم في اتخاذ وتنفيذ القرار
و أصعب اختبار لما القرار اللي عاوز تاخده ماحدش يشجعك عليه نهائيا ... إنت بس اللي بتكون شايف حاجة ماحدش تاني شايفها
هل هتسمع صوت قلبك وللا هتسمع صوت الناس اللي حواليك؟
مثلا ... لما قررت أبيع شركة Chess Your Child كل الناس اللي حواليا و الخبراء في البزنس قالولي دي خطوة غلط ...
لإن البزنس ناجح جدا و فكرته عبقرية و لسه السوق فيه أخضر و فيه مساحة كبيرة للتطوير و النمو
فبالورقة و القلم القرار يبدو خاطئ ...
بس أنا الوحيد اللي كنت شايف المرحلة الجاية في حياتي أولوياتها إيه ... و رؤيتي ليها إيه ...
و هنا يجي دور شجاعة القرار اللي يخليك تعيش حياتك بأسلوبك مش باسلوب مفروض عليك
و الحمد لله ماندمتش أبدا على القرار ده ...
بالعكس فرحت أكتر لما شوفت القائد والفريق الحالي للبزنس إزاي قدرت تاخده لمستوى أعلى و أكبر من التطور و النجاح
و طبعا وارد إنك تاخد قرار غلط ...
عادي هي دي الحياة ... تجارب و اخفاقات و نجاحات
المهم في الآخر تكون راضي عن نفسك ... و كل يوم تكون بتبني حياة كبيرة تبقى فخور بيها