امبارح عرفت معلومة خطيرة و الحقيقة اتكسفت إني أول مرة أعرفها
إن أول جمع صوتي للقرآن كان بصوت الشيخ الحصري رحمه الله
طبعا ده بعد الجمع الكتابي في عهد أبو بكر الصديق رضي الله عنه
لما بحثت شوية ورا الموضوع لاقيت إن صاحب فكرة الجمع الصوتي للقرآن الكريم هو الدكتور لبيب السعيد سنة ١٩٦١
واللي بعدها أسست إذاعة القرآن الكريم علشان تبث التسجيل ده على مدار الساعة
المعلومة دي أكدت الفكرة اللي دايما بحاول أوصلها للناس
“إنك تخلي حياتك أطول من عمرك”
إن أرقى أسلوب ممكن تعيش بيه حياتك هو إنك تضيف للدنيا قيمة استثنائية غير مسبوقة تخلي الحياة أفضل بكتير لأهل زمنك ولأهل الأزمنة اللي بعدك
المشروع اللي الدكتور لبيب السعيد أجتهد عليه خلاه أسطورة من أساطير التاريخ
إوعى تعيش صغير … صحيح إنت اتولدت صغير … بس لازم تموت كبير
ربنا يكتبلنا جميعا عظيم الأثر في الدنيا و يرفع بيه مكانتنا في الآخرة برحمته