رسالتي في الحياة

أنا فضلت ٦ سنين ببحث عن رسالتي في الحياة

لحد في يناير ٢٠٠٣ ما وقع في إيدي بالصدفة كتاب
Awaken The Giant Within - by Tony Robbins

بعد الكتاب طريقي بقى واضح جدا و عرفت أنا عايش ليه... و إيه الأثر اللي عاوز أسيبه من بعدي

لما بتأمل المشهد ده في حياتي بتعجب جدا ... ليه و إزاي فضلت أبحث عن حاجة غير مألوفة و غير ملموسة ٦ سنين متتالية؟

ناس كتير بيكونوا عاوزين يعرفوا رسالة حياتهم أو شغفهم ... بس في حقيقة الأمر لما تسألهم تكتشف إنهم ماقضوش ساعة واحدة حتى في البحث

هما واقفين عند نقطة أنا مش عارف رسالتي إيه ... أنا مش عارف شغفي إيه
طيب عملت إيه علشان تعرف؟ ... ولا أي حاجة

أنا فضلت ٦ سنين ببحث و بجرب حاجات كتير جدا علشان كنت عارف أهمية الأمر ده في تحديد مصيري و مستقبلي ... و تصميم حياة شبهي حياة مشبعة و مرضية بالنسبالي ... حياة أعيشها باسلوبي مش باسلوب مفروض عليا

صناعة حياة عظيمة مش بتيجي بالتمني ... بتيجي بالسعي الجاد

و إحنا داخلين على السنة الجديد .. خد قرار حاسم

إنت فعلا عاوز تغير حياتك و هتسعى بجدية علشان تحقق أحلامك ... و لا هتضيع سنة تانية من عمرك و إنت بتتمنى فقط