لأي حد عاوز يبدأ بزنس و خايف من المخاطرة ... خليني أوضحلك نقطة مهمة ممكن تكون غايبة عنك
البزنس لا يحتاج إلى مخاطرة
المخاطرة مصدرها حاجة واحدة فقط ... الفلوس
١. هتسيب الشغل و مصدر دخلك الأساسي
أو
٢. هتحط رأس مال كبير في المشروع (من تحويشة عمرك أو من مصدر تمويل سواء مستثمر أو استلفت ... إلخ)
و بالتالي الخوف من الفشل هنا في محله ... لإن الخسارة هتكون كبيرة و مؤلمة جدا
لكن تخيل معايا السيناريو الآتي
١. إنت قررت تبدأ بزنس في حاجة بتحبها
٢. خصصت ساعة كل يوم بعد ما ترجع من الشغل لممارسة الحاجة اللي بتحبها ... و في نفس الوقت بدأت تبحث في المجال و تشوف أفكار المشاريع الناجحة فيه
٣. مع البحث لاقيت فراغ بيمثل مشكلة أو احتياج عند فئة من الناس و قررت تبدأ بزنس حوالين المشكلة دي
٤. قررت تستثمر ٢٠٪ من مدخراتك فقط ... و بدأت بداية صغيرة و لكن فعّالة ... من بيتك بعد ساعات الشغل
٥. بدأت تسوّق للمشروع في دايرتك القريبة ... من المعارف والأصدقاء
٦. الناس بدأت تقولك تعليقات إيجابية جدا و مشجعة ... وبدأت تحسن من المنتج/الخدمة و تطورها
٧. تواجدك على السوشيال ميديا بدأ يكبر واحدة واحدة ... وبدأت تبيع لناس كتير برة دايرة معارفك
٨. الطلب فضل يزيد و المشروع بينجح و يتعرف أكتر ... و أصبح دايما فيه طلب أكبر من قدرتك على تلبيته ... بسبب ضيق الوقت جنب الشغل
٩. بدأت تفكر إنك تتفرغ للمشروع و تبني على النجاح اللي حققته
١٠. حطيت خطة مالية تشمل تخصيص مدخرات تكفي مصاريفك والتزاماتك لمدة ٦ شهور على الأقل ... و كمان توقع لأرباح المشروع و إزاي هيغطي مصاريفك بعد ما تتفرغ و تتوسع
و بناءا على كل ما سبق توكلت على الله و استقلت و بدأت تحقق حلم عمرك
فين المخاطرة في السيناريو ده؟
طيب السوق متقلب و البزنس ممكن يتعثر و أبقى خسرت كل حاجة
و هو ده مش وارد في الوظيفة برضه؟
مش وارد في يوم و ليلة يستغنوا عنك؟
يعني دي مخاطرة من ضمن تحديات الحياة اللي كلنا ممكن نتعرض ليها ... سواء في وظيفة أو بزنس خاص
البزنس مافيهوش مخاطرة لو مشيت بنظام مدروس و خطوات صغيرة و ثابتة
و طبعا علشان تعمل كدة لازم يكون عندك رغبة و حلم حقيقي عاوز تشوفه بيتحقق و يكبر قدام عينك