“إزاي حولنا أحد أكتر طرق العمل حرية ومتعة... لسباق مرهق ملوش نهاية؟”
أنا شايف إننا أفسدنا ريادة الأعمال
كبر... وسع... وظف... افتح فروع... زود مبيعات... ضاعف أرباح
بقينا نتعامل مع المشروع الصغير كإنه تجربة لسه ما نجحتش
“إيه خطتك للتوسع؟”
“هتزود أرباحك إزاي؟”
“وفي خلال قد إيه؟”
كإن إنك تفضل صغير ده فشل... وكإن النمو في حد ذاته هدف
بعد أكتر من ٢٠ سنة في ريادة الأعمال، أنا شايف إن فيه ٤ شروط ممكن تخلينا نستمتع بيها من تاني
**١. صغير**
من البداية ابن مشروعك على إنه يفضل صغير
مش قلة طموح... بالعكس
الحجم الصغير بيديلك حاجة غالية جدا: **الحرية
حرية تختار تشتغل مع مين، تتحرك بسرعة، ومايبقاش فوق دماغك مصاريف ضخمة تجبرك تجري طول الوقت
ماتحاولش تبني أكبر شركة تقدر تبنيها
ابن أصغر شركة توفرلك الحياة اللي إنت عاوزها
**٢. متخصص**
لو اخترت تفضل صغير، لازم تبقى قوي
وأقصر طريق لقوة المشروع الصغير هو التخصص
ماتبيعش كل حاجة لكل الناس
اختار حاجة محددة وابقى ممتاز فيها لدرجة إن نوع معين من العملاء يدور عليك إنت بالذات
السوق الصحي مش كام شركة ضخمة بتعمل كل حاجة
السوق الصحي مشاريع صغيرة كتير... كل مشروع متميز في حاجة محددة وبيعملها بشكل ممتاز
**٣. بسيط**
قاوم التعقيد والترندات
مش كل مشروع محتاج فريق كبير، عشرين أداة، خمس منصات،
funnel
معقد، برسونال براندينج أو ذكاء اصطناعي
جوهر البزنس بسيط
اعمل حاجة ليها قيمة... اوصل للناس اللي محتاجاها... عرفهم بيها... بيعلهم بسعر عادل... واخدمهم كويس
لو تقدر تحقق نفس النتيجة بطريقة أبسط... اختار الأبسط
لإن المشروع اللي محتاج مكنة ضخمة علشان يشتغل، في وقت ما هتلاقي نفسك إنت اللي بتشتغل عند المكنة
**٤. مغني**
ودي الغاية النهائية
أنا مش عاوز مشروع يحقق أكبر قدر ممكن من الفلوس
أنا عاوز مشروع **مغني
يحقق ربح كفاية يخليك تعيش مرتاح، تحس بالأمان، تعمل الحاجات اللي بتحبها، تسيب أثر طيب، ويكون عندك مساحة تستمتع بحياتك
لحد ما توصل لنقطة تقول
**أنا عندي ما يكفيني علشان أعيش بالطريقة اللي اخترتها
ساعتها النمو والتوسع مايبقاش فرض... يبقى اختيار
هي دي ريادة الأعمال اللي نفسي نستمتع بيها
**صغيرة في حجمها
متخصصة في قيمتها
بسيطة في تشغيلها
مغنية في عائدها
إحنا أخدنا واحدة من أكتر طرق الشغل حرية في العالم... وحولناها لسباق لا ينتهي من أجل “المزيد”
فبدل ما تسأل
“مشروعي ممكن يكبر لحد فين؟”
جرب تسأل
**“إيه أصغر مشروع ممكن يديني أكبر حياة؟!”**